Uğursuz Marketinq Kampaniyaları: Balenciaga, Adidas, Pepsi və Digərləri

Marketinq kampaniyaları çox vaxt böyük risklərlə müşayiət olunur. Uğurlu olarsa, brendi zirvəyə qaldırır, uğursuz olarsa isə həm nüfuz, həm də milyonlarla dollar itirə bilər. Hər bir kampaniya markanı zirvəyə daşıya da bilər, tamamilə məhv də edə bilər. Çünki marketinq sadəcə məhsul satmaq deyil insanların emosiyalarına, inanclarına, gündəlik vərdişlərinə toxunmaqdır. Təsəvvür edin: milyonlarla dollar büdcə, ən güclü komanda, dünyanın ən tanınmış brendləri… Amma yenə də uğursuzluq. Ən maraqlısı isə odur ki, bu səhvləri kiçik şirkətlər yox, dünyanın ən güclü brendləri etdi.

‍

‍

Balenciaga – Tənqid Olunan Reklam Kampaniyası

Lüks moda brendi Balenciaga 2022-ci ildə yeni kampaniyasında uşaqları “seksual məna daşıyan” aksessuarlarla təqdim etdi. Oyuncaqlar BDSM elementlərini xatırladırdı.

Nəticə:

Sosial mediada böyük qəzəb yarandı. İnsanlar bunu “uşaqlardan sui-istifadəni normallaşdırmaq” kimi gördülər.

Kim Kardashian da daxil olmaqla bir çox məşhur brendlə əməkdaşlığını dayandırdı.

Balenciaga dərhal üzr istədi, amma hələ də imic bərpa olunmayıb.

‍

‍

Adidas və Kanye West – Gecikmiş Reaksiya, Böyük Zərər

Adidas uzun illər Kanye West ilə “Yeezy” ayaqqabılarını istehsal edirdi. Bu əməkdaşlıq milyardlarla gəlir gətirmişdi. Amma Kanye antisemit bəyanatlar verdikdən sonra Adidas gec reaksiya verdi.

Nəticə:

İctimaiyyət Adidas-ı “yalnız pulla maraqlanmaqda” ittiham etdi.

Nəticədə şirkət əməkdaşlığı dayandırmalı oldu, amma artıq brendin imicinə ciddi zərər vurulmuşdu.

Həm də maliyyə baxımından Adidas bir neçə milyard dollar zərər gördü.

‍

‍

Burger King – “Women Belong in the Kitchen”

Burger King UK Beynəlxalq Qadınlar Günü münasibətilə Twitter-də “Women belong in the kitchen” (Qadınların yeri mətbəxdədir) tviti paylaşdı. Məqsəd əslində qadınlara kulinariya sahəsində daha çox təhsil imkanı yaratmaq idi. Amma insanlar ilk cümləni oxuyub qəzəbləndi.

Nəticə:

Tviti cəmi bir neçə dəqiqə içində on minlərlə insan tənqid etdi.

Şirkət ardınca izahat versə də, artıq gec idi. Qadınlar günündə seksist zarafat etməyin heç bir izahı qəbul edilmədi.

Burger King üzr istəsə də, reputasiya zərbə aldı.

‍

‍

Pepsi və Kendall Jenner Reklamı

Pepsi brend tarixi boyunca “daha gənc, daha azad” imici ilə tanınıb. Amma 2017-ci ildə yayımlanan reklamda bu imic tamamilə uğursuz alındı. Videoda model Kendall Jenner küçə etirazına qoşulur, polislə qarşıdurma yaranır və o, polisə Pepsi uzadaraq “sülh gətirir”.

Nəticə nə oldu?

Reklam dərhal sosial mediada qəzəblə qarşılandı. İnsanlar sosial ədalət və irqçilik mövzularını bu qədər səthi və “soda ilə həll ediləcək” kimi göstərməyin təhqiramiz olduğunu düşündülər. Pepsi məcbur qalıb reklamı geri çəkdi və üzr istədi.

‍

‍

GAP – Loqonun dəyişdirilməsi

Dünyanın ən tanınmış geyim brendlərindən biri olan GAP illərlə istifadə etdiyi klassik mavi loqosunu 2010-cu ildə dəyişdi. Yeni dizayn minimalistik idi, amma brendin simvolikliyini tamamilə itirmişdi.

Nəticə nə oldu?

Müştərilər sosial mediada kütləvi şəkildə etiraz etdilər. Hətta “Bring Back the Blue Box” (Mavi qutunu geri qaytarın) adlı kampaniya başladı. GAP cəmi 6 gün sonra köhnə loqosuna geri dönməyə məcbur oldu.

Bütün bu fiaskolar bizə göstərir ki, marketinq sadəcə kreativ ideya deyil, həm də məsuliyyət, empatiya və auditoriyanı düzgün anlamaq sənətidir.

‍