Rəqib analizini necə edilməlidir?

Rəqib analizini necə etməliyik?

‍

“Həm özünü, həm qarşındakını tanıyırsansa, qarşıda 100 müharibə də olsa qorxmağa səbəb yoxdur. Əgər özünü tanıyıb, qarşındakını tanımırsansa, hər qələbənin içində bir məğlubiyyət olacaq. Nə özünü, nə də qarşındakını tanımırsansa, hər müharibədə məğlub olacaqsan” —Sun Tzu.

‍

Rəqəmsal marketinq də belədir. Əgər rəqibləriniz haqqında məlumatlı deyilsinizsə, uğur qazana bilməyəcəksiniz.

‍

Bəs rəqiblər haqqında məlumatı necə əldə etmək olar?

‍

Əlbəttə ki, rəqib analizi edərək!

‍

Bu gün rəqib analizininin önəmini, arxa plana atıldıqda baş verə biləcəkləri, rəqib analizini necə etməli olduğunuzdan bəhs edəcəm.

‍

‍

Rəqib analizi nədir?

‍

Rəqib analizi rəqiblərin məhsullarını, satış və marketinq strategiyalarını və biznes fəaliyyətlərini öyrənmək üçün edilən bir araşdırmadır.

‍

Rəqib analizinin məqsədi rəqiblərinizin əsas üstünlüklərini aşkar etmək və onları öz biznesinizlə müqayisə etməkdir.

‍

Əslində, rəqib analizi rəqibləriniz haqqında deyil, öz biznesiniz haqqında araşdırmadır. Rəqib analizi edərək, siz bir növ öz boşluqlarınızı araşdırırsınız və onları aradan qaldırmağın yollarını tapırsınız.

‍

Rəqib analizini etməyin bir neçə üsulu var və siz biznesinizə ən uyğun olanı seçməlisiniz. Rəqib analizinə başlamazdan öncə bir neçə mühüm suala cavab tapmaq lazımdır.

‍

• Bu analizin son məqsədi nədir?

‍

Düzdür, rəqib analizi sizə əhəmiyyətli məlumatlar verir, ancaq son məqsədi bəlli olmayan bir rəqib analizi effektiv olmayacaq. Buna görə də əvvəlcədən özünüzə sual verin: Məqsədiniz nədir? Rəqiblərdən niyə geri qaldığımızı öyrənmək ya yeni təklif etdiyiniz məhsula rəqiblərin nə qədər sürətli cavab verdiyini ölçmək?

‍

• Analizin miqyası nədir?

‍

Siz rəqibinizin sosial media marketinq komandasının Facebook reklamlarındakı nəticəsini öyrənmək istəyirsiniz, yoxsa rəqibinizin ümumi marketinq strategiyasını? Miqyası doğru təyin edərək tətbiqi daha rahat olan nəticələr əldə edəcəksiniz.

‍

• Araşdırma kanalları nələrdir?

‍

Qısa müddətdə əhəmiyyətli məlumatlar əldə etmək üçün internet əvəzsiz bir vasitədir, ancaq sizə bütün incə məqamları çatdırmaya bilər. Bu səbəbdən, əgər ciddi bir rəqib analizi etmək istəyirsinizsə, rəqibinizin xidmətlərindən yararlanaraq onların müştərisinə çevrilə və onları daha yaxşı analiz edə bilərsiniz.

‍

• Analiz üçün ayrılan müddət nə qədərdir?

‍

Əgər siz qısa müddətdə fəaliyyətə keçmək istəyirsinizsə, kiçik bir araşdırma ilkin mərhələ üçün kifayət edəcəkdir. Ancaq daha uzun müddətli strategiya qurmaq üçün analizə ayrılan vaxt və büdcə artırılmalı, daha sistematik yanaşma olmalıdır. Əks təqdirdə, bu analizə daha çox resurs ayıran rəqibləriniz sizi biznes mühitində geridə qoyacaq.

‍

• Analizin büdcəsi nə qədərdir?

‍

• Ən mühüm məsələlərdən biri də büdcədir. Büdcənin düzgün təyin edilməsi həm analiz edən əməkdaşlarınızın işini rahatlaşdıracaq, həm də analizin keyfiyyətinə birbaşa təsir göstərəcək. Təbii ki, sıfır büdcə ilə də effektiv rəqib araşdırması etmək olar, büdcənin təyin edilməsində məqsəd işi asanlaşdıracaq vasitələrdən istifadə etmə imkanının olub-olmamasını müəyyənləşdirməkdir.

‍

‍

Rəqib analizi faydaları nələrdir?

‍

Rəqibləriniz haqqında məlumatınız birbaşa bazar payınıza və satışlarınıza təsir edir. Mütəmadi bazar araşdırması və rəqib analizi etməməyin ciddi nəticələri ola bilər.

‍

Belə ki, siz daimi müştərilərinizi belə itirə bilərsiniz. Bu tip halların baş verməməsi üçün rəqabəti qabaqlamaq, yəni rəqib analizi etmək önəmlidir.

‍

Bundan əlavə, rəqib analizinin ilk başda hiss edilməyən, gizli faydaları da var.

‍

• Neqativ müştəri fikirlərindən faydalanmaq
• Bazardakı boşluqları ortaya çıxarmaq
• Müştəri davranışını aşkar etmək

‍

‍

1.  Neqativ müştəri fikirlərindən faydalanmaq

‍

Biznesdə hansı təkliflərlə çıxış etsəniz də, hamını məmnun etmək mümkün deyil. Müştərilər həmişə narazı olmaq üçün bir məsələ tapacaqlar.

‍

Rəqib analizi etdikdə sadəcə öz müştərilərinizin deyil, rəqiblərinizin müştərilərinin də nələrdən narazı olduğunu öyrənə biləcəksiniz. Bu həm sizin marketinq strategiyanızda, həm də yeni məhsullarınızda özünü göstərə bilər.

‍

Gəlin Kapital bankın bu reklamına nəzər salaq:

‍

‍

‍

‍

Burada yazılan “Bizdə saat fərqi yoxdur” mesajı həm 24/7 köçürmə xidmətlərinin mövcud olduğunu, həm də rəqiblərdə bunun olmadığını müştəriyə çatdırır.

‍

Bu mesaj, düzgün rəqib araşdırmasının nəticəsidir.

‍

Düşünə bilərsiniz ki, bank xidmətlərindən hamımız istifadə edirik, buna görə də burada ciddi bir rəqib analizindən söz gedə bilməz.

‍

Bir nöqtəyə qədər haqlı da olarsınız. Elə buna görə də gəlin başqa bir nümunəyə nəzər salaq:

‍

‍

‍

‍

“Starex” karqo şirkətinin bu reklamı rəqiblərin “sifariş et” xidmətində komissiya tutduqlarından, onların isə bunu komissiyasız etdiyindən bəhs edir.

‍

Ancaq burada əsas göstərmək istədiyim bu deyil.

Bu posterin paylaşıldığı Facebook postunun rəylərinə nəzər saldıqda belə bir müştəri narazılığı ilə rastlaşırıq:

‍

‍

‍

‍

‍

Burada iki müxtəlif narazılıq var: Birincisi qiymətlərin yüksək olması, ikincisi isə paket birləşdirmə xidmətinin olmamasıdır.

Rəydən də göründüyü kimi, düzgün bazar araşdırması edən “azex” və “kargofly” şirkətləri rəqiblərinin bu boşluğunu aydınlaşdıraraq artıq bu xidməti təklif ediblər.

‍

‍

2.  Bazardakı boşluqlardan yararlanmaq

‍

Bazarda daima boşluqlar olur. Əsas məsələ bu boşluqları ortaya çıxarmaq və onlara uyğun təkliflər etməkdir.

‍

Rəqibləri analiz etmək bu məqsədə çatmaq üçün ən effektiv üsullardan biridir. Düşünə bilərsiniz ki, bazarda ən böyük olmaq bazarda qələbə çalmaq deməkdir.

‍

Ancaq unutmamaq lazımdır ki, kiçik rəqiblər bazar liderləri üçün çox daha təhlükəlidir. Çünki müştərilər ən böyük (və ən reputasiyalı) şirkət siz qala-qala, o kiçik şirkətin xidmətlərindən faydalanırlar.

‍

Demək ki, həmin o balaca şirkətin sizlə nisbətdə bir üstünlüyü var və siz rəqib analizi etməsəniz bu üstünlüyün nə olduğunu bilməyəcəksiniz və gələcəkdə həmin rəqibinizə məğlub olacaqsınız.

‍

Bunun bir neçə nümunəsi artıq mövcuddur. Gəlin elə hamımızın yaxından tanıdığı iki şirkətə nəzər salaq: “Baku Electronics” və “World Telecom”.

‍

‍

‍

‍

“Baku Electronics” 1994-cü ildə, bir türk holdinqinin dəstəyi ilə qurulub. Ondan cəmi 1 il sonra isə rəsmi “Samsung” distribütoru olub.

‍

‍

‍

“World Telecom” isə 1998-ci ildə qurulub və uzun müddət kiçik bir mağaza olaraq davam edib.

‍

Hazırda isə, mağazaların sayına görə “World Telecom” “Baku Electronics”dan irəlidədir (20 və 18).

‍

Həm türk maliyyə qüvvəsinə sahib, həm də “Samsung”un rəsmi distribütoru olan bir şirkət, necə kiçik bir mağazadan geriyə düşüb?

‍

Bunun bir sıra səbəbləri olsa da, başlıca səbəb düzgün rəqib analizi və bazar araşdırmasıdır. “World Telecom” şirkəti düzgün bazar araşdırması edərək rəqiblərinin təklif etmədiyi yenilik gətirib və rəqiblərini qabaqlaya bilib.

‍

‍

3.  Müştəri davranışını aşkar etmək

‍

Müştəri davranışının düzgün başa düşülməsi bazar payını artırmaq üçün ən vacib nüanslardan biridir. Təklifiniz nə qədər uğurlu və faydalı olsa da, müştərilərin bir problemini həll etmirsə, daha doğrusu, müştəri davranışına uyğun gəlməyən problemləri həll edirsə, məhsulunuz uğursuz olacaq.

‍

Bunun nümunəsi də elə 6 ay əvvəl hər yerdə gördüyümüz “Smilepay” reklamlarını artıq heç bir yerdə görməməyimizdir.

‍

Əvəzində isə, “mpay” və “PashaPay” kimi ödəniş portalları aktiv şəkildə müştəri cəlb edir.

‍

Düzgün rəqib analizi etməyi bacaran bu iki şirkət digər rəqiblərini qabaqlayaraq bazarda ən böyük paya sahibdirlər.

‍

Əlbəttə ki, müştəri davranışının da burda çox böyük önəmi var.

‍

‍

Belə ki, “mpay” ödəniş portalı insanların aktiv istifadə etdiyi “eManat” sisteminin, “PashaPay” isə “Milliön” sisteminin arxasındakı ödəniş portallarıdır.

‍

‍

Bu iki xidmət uzun müddətdir bazardadırlar və müştəri davranışını müəyyən etməkdən əlavə, həm də ona yön veriblər.

‍

Bu səbəbdəndir ki,hazırda “Smilepay” kimi innovativ fikirlər uğursuz olduğu halda, bu iki təklif bazar liderliyini qoruyur.

‍

‍

Rəqib analizini necə etməli?

‍

Rəqib analizini etməyin bir neçə yolu olsa da, ən sadə yollarından biri belədir:

‍

1. Rəqiblərinizin kim olduğunu müəyyən edin
2. Rəqiblərinizin məhsullarını araşdırın
3. Rəqiblərinizin satış taktikalarını aşkarlayın
4. Rəqiblərinizin qiymətlərinə nəzər salın
5. Rəqiblərinizin açar sözlərinin nə olduğunu öyrənin
6. Rəqiblərinizin kontent strategiyasını müəyyənləşdirin
7. Rəqiblərinizin SWOT analizini edin
8. Rəqiblərinizin müştərilərini analiz edin, onlar haqqında neqativ və pozitiv fikirləri aydınlaşdırın

‍

Rəqib analizini daha asan başa düşmək üçün avtomobil servisi üzərindən nümunələr verəcəm.

‍

‍

1.  Rəqiblərinizin kim olduğunu müəyyən edin

‍

Rəqib analizində ilk mərhələ rəqiblərinizin tam olaraq kimlər olduğunu müəyyən etməkdir. Böyük rəqiblərinizin haqqında məlumatınız ola bilər, əsas məqsəd əhatəli bir bazar araşdırması edib bütün rəqiblərinizi tapmaqdır.

‍

Bunu etmək üçün müştərilərinizə suallar ünvanlaya, internet üzərindən araşdırma apara və ya sosial media hesablarına nəzər sala bilərsiniz.

‍

İkinci məsələ rəqiblərinizin təkliflərini və onların hansı müştəri ehtiyaclarını ödədiyini müəyyən etməkdir.

‍

Bu rəqib analizinin əsasında rəqiblərinizi birbaşa və ikinci dərəcəli rəqib olaraq ayırırsınız.

‍

Birbaşa rəqiblər sizinlə oxşar məhsulları təklif edən və oxşar əsaslarla rəqabət apardığınız rəqiblərdir.

‍

Avtomobil servisində birbaşa rəqiblər digər servislər və fərdi qaydada xidmət göstərən ustalardır.

‍

İkinci dərəcəli rəqiblər isə taksi və ictimai nəqliyyat xidmətləridir.

‍

‍Niyə?

‍

Çünki müştərilər avtomobillərini təmir etdirmək üçün sizin xidmətlərinizdən faydalanırlar. Avtomobili təmir etdirməkdə əsas məqsəd isə nəqliyyatdır.

‍

Yəni, gələcəkdə taksi qiymətləri aşağı düşərsə, insanlar öz avtomobillərini idarə etmək yerinə taksiyə minə bilərlər, beləliklə də nəqliyyat ehtiyaclarını daha fərqli yolla ödəyib sizin xidmətlərinizdən daha az istifadə edərlər.

Rəqib analizi etdikdə bu növ incə məqamlara diqqət yetirmək önəmlidir.

‍

‍

2.  Rəqiblərinizin məhsullarını araşdırın

‍

Rəqib analizinin ikinci mərhələsi onların hansı məhsulları təklif etdiyini araşdırmaqdır.

‍

Məhsulları araşdırarkən onların keyfiyyətinə, qiymətinə, xərcinə və eyni məhsulu sizin təklif edib etmədiyinizə baxmalısınız.

‍

Eyni zamanda onların məhsullarının premium, yoxsa aşağı qiymətli məhsullar olduğunu da aşkarlamalısınız.

‍

Rəqib analizi edərkən məhsulları araşdırmaq üçün bu suallardan istifadə edə bilərsiniz:

‍

• Onlar premium, yoxsa aşağı qiymətlli məhsullar təklif edirlər?
• Bazar payı nə qədərdir?
• Onlar üçün önəmli olan daimi satışlardır, yoxsa birdəfəlik?
• Onların məhsulları bizimkilərdən nə ilə fərqlənir?
• Onlar məhsullarının çatdırılmasını necə edirlər?

‍

Yenidən avtomobil servisi nümunəmizə nəzər salaq. Əgər siz servis olaraq göstərirsinizsə, xidmətləriniz daha premium səviyyə olacaqdır.

‍

Bu halda, fərdi xidmət göstərən ustalar sizdən daha aşağı qiymət təklif edəcəklər.

‍

Ancaq onlar üçün birdəfəlik satışların önəmi azalacaq və çatdırılma xidmətləri təklif etməyəcəklər.

‍

Bundan əlavə bazar payları rəqabətə nisbətdə daha aşağı olacaq və sizin xidmətlərinizdən keyfiyyətinə və istifadə edilən detalların orginallığına görə fərqlənəcək.

‍

‍

3.  Rəqiblərinizin satış taktikasını aşkarlayın

‍

Satış hər bir biznes üçün ən önəmli məsələdir.

‍

Bu səbəbdən də, rəqiblərinizin satış strategiyasına yaxından bələd olmalısınız.

‍

Satış strategiyasını müəyyən etmək üçün ən yaxşı üsul onların təkliflərindən faydalanmaqdır. Ancaq bunu etmək istəmirsinizsə, aşağıdakı suallara cavab taparaq ümumi bir fikir formalaşdıra bilərsiniz:

‍

• Onların neçə satış məntəqəsi var?
• Onlar hansı satış kanallarından istifadə edirlər?
• Onların əsas müştəri şikayətləri nədəndir?
• Ümumi satışları və gəlirləri nə qədərdir?
• Satış mütəxəssislərindən nə qədər asılıdırlar?
• Onlar hazırda satış şəbəkələrini böyütməyə çalışırlarmı?

‍

Bütün bu suallar daha effektiv bir rəqib analizi etmək üçün önəmlidir.

‍

Yenidən servis biznesinə qayıdaq. Burada satış taktikasını tapmaq üçün rəqiblərinizin korporativ müştərilərinin nə qədər olduğunu müəyyən etməlisiniz. Bu satış mütəxəssislərindən nə qədər asılı olduqlarını müəyyənləşdirmək üçün vacibdir.

‍

Daha sonra satışları və ümumi gəlirləri, servis məntəqələri və istifadə etdikləri satış kanalları haqqında məlumat toplamalısınız.

‍

Ən sonda isə onların korporativ müştəriləri ilə əlaqə saxlayıb ən böyük problemlərini araşdırmalı və bu problemlərə uyğun təkliflərinizi göndərməlisiniz.

‍

Beləliklə, kiçik bir rəqib analizi sizə böyük bir korporativ müştəri qazandıra bilər.

‍

‍

4.  Rəqiblərinizin qiymətlərinə nəzər salın

‍

Rəqib analizinin əsas məqsədi rəqiblərin qiymətləri və ümumilikdə bazar standartları haqqında məlumat sahibi olmaqdır.

‍

Buna görə də düzgün qiymət araşdırması etmək lazımdır. Rəqib qiymətlərini düzgün analiz etmək onların məhsulları haqqında da ətraflı məlumat verir.

‍

Məsələn, rəqibləriniz premium qiymətdə məhsul satırlarsa, ehtimal ki, məhsullarının keyfiyyəti də bu standarta uyğundur.

‍

Eyni zamanda, bunu tərsinə istifadə etmək də mümkündür. Belə ki, əgər rəqiblərinizin məhsullarının keyfiyyətinə bələdsinizsə, qiymət strategiyasınızı buna uyğun formalaşdıra bilərsiniz.

‍

Əgər rəqib məhsulunun keyfiyyəti sizin məhsuldan daha aşağıdırsa, siz öz qiymətinizi qaldıraraq premium bir təklif yarada bilərsiniz.

‍

Yenidən servis biznesinə baxaq. Tutaq ki, rəqibiniz qiyməti sizin qiymətinizlə eynidir. Bu sizə rəqib məhsulların keyfiyyəti haqqında müəyyən bir məlumat verməlidir.

‍

Əgər siz rəqibinizin xidmətlərindən faydalanıb, onların hansı detallardan istifadə etdiyini öyrənmisinizsə, o zaman siz qiymətinizi də buna uyğun dəyişə bilərsiniz.

‍

‍

5.  Rəqiblərinizin açar sözlərinin nə olduğunu öyrənin

‍

Reklam satışın tərkib hissəsidir. Rəqib analizi edərkən onların satış taktikaları və məhsul keyfiyyəti qədər reklam strategiyalarını da öyrənmək lazımdır.

‍

Bundan əlavə, reklamları analiz edərkən diqqət yetirməli olduğunuz əsas məsələ istifadə edilən açar sözlərdir.

‍

Düzgün açar söz seçimi etmək həm reklam alqoritmlərinin daha yaxşı işləməsi, həm də müştərilərin diqqətini cəlb etmək üçün önəmlidir.

‍

Rəqibinizin əsas açar sözünü öyrənmək üçün veb saytlarda “meta description”, sosial media səhifələrində isə “bio”ya baxmaq yetərlidir.

‍

Məsələn, gəlin nümunəmizə nəzər salaq. Əgər rəqib analizi zamanə rəqibinizin “avto temir” əsas açar sözünü “Instagram” axtarışına verdikdə bu səhifə ilk sırada çıxır

‍

‍

‍

‍

Avto servis yazdıqda isə, fərqli bir səhifə çıxır.

‍

‍

‍

Nəticədə hər iki məhsul eyni xidmətləri təklif etsə də, onlar müxtəlif açar sözlərdən istifadə edirlər.

‍

Bu səbəbdən də, müxtəlif açar sözlərlə axtarış edən insanlar müxtəlif biznesləri görürlər və onlarla işləməyə qərar verirlər.

Elə buna görə də rəqiblərin reklam strategiyalarına və onların reklamlarda istifadə etdikləri əsas açar sözləri bilmək önəmlidir.

‍

6.  Rəqiblərinizin kontent strategiyasını müəyyən edin

‍

Kontent strategiyası rəqib analizində ən vacib məsələlərdəndir. Rəqibinizin kontent strategiyasının nə olduğunu müəyyən edə bilsəniz onların biznesinin müştərilərə nə təklif etdiyini də asanlıqla öyrənə biləcəksiniz.

‍

Rəqib analizi edərkən kontent bəzən önəmsiz hesab edilir və arxa plana atılır, ancaq bu böyük bir səhvdir. Rəqibinizin kontentini analiz edərək neçə məlumat verici, neçə satış postu paylaşdığını öyrənərək onların strategiyalarını aşkara çıxara bilərsiniz.

‍

Bir daha servis biznesimizə baxaq.

‍

‍

‍

‍

Göründüyü kimi bu səhifənin kontent strategiyası sadəcə vizualları paylaşmaqdan ibarətdir.

‍

‍

‍

Digər rəqib isə həm şəkil paylaşır, həm də görülən işlər haqqında məlumat verir.

‍

Göründüyü kimi səhifələrdə məlumatlandırıcı post paylaşan səhifələr çox azdır. Lakin “Facebook” qruplarında kifayət qədər sual verilir və məlumatlar bölüşülür.

‍

Bu göstərir ki, həm məlumata ehtiyac var, həm də məlumat sahibi kifayət qədər ekspert var. Bununla belə, ətraflı məlumat verən bir səhifənin olmaması bu sahəyə kifayət qədər vaxt ayıran bir səhifənin qısa müddətdə inkişaf edə biləcəyinə xəbər verir.

‍

‍

7.  Rəqiblərinizi SWOT analizi edin

‍

SWOT analizi hər bir rəqib analizinin ən vacib hissəsidir. Bunun sayəsində siz rəqiblərinizin bütün fəaliyyətləri haqqında məlumat əldə edirsiniz və öz biznesinizlə müqayisə edə bilirsiniz.

‍

SWOT analizi ingilis dilindən götürülüb və hər bir baş hərf analizin bir hissəsini bildirir.

‍

Strengths (Güclü tərəflər) - rəqiblərinizin hansı sahədə güclü olduğunu və sağlam bir əsası olduğunu göstərir.

‍

Weaknesses (Zəif tərəflər) - rəqiblərinizin əsas zəifliklərinin nə olduğunu göstərir. Buna xüsusi diqqət yetirmək lazımdır.

‍

Opportunities (İmkanlar) - rəqiblərinizin biznesdə imkanlarını göstərir. İmkanlar dedikdə hədəf kütləyə aid olan, ancaq şirkətin xidmət göstərmədiyi sektor, bir növ reallaşmayan potensial nəzərdə tutulur.

‍

Threats (Təhlükələr) - rəqiblərinizin biznes fəaliyyətində olan təhlükələri göstərir. Məsələn, hansısa xüsusi bir detalın istehsalının dayanması, yaxud da detalın gömrük rüsumunun artırılması onlardan biri ola bilər.

‍

SWOT analizi çox dərin və zəhmət tələb edən bir işdir, bu səbəbdən də düzgün yanaşma ilə işə başlamaq lazımdır.

‍

‍

8.  Rəqib müştərilərini analiz edin

‍

Rəqib analizində ən mühüm məsələlərdən biri də müştəriləri analiz etməkdir. Bunun üçün ən təkmil vasitə sosial dinləmə alətlərindən istifadə etməkdir.

‍

Ancaq ölkəmizdə bu alətlərə çıxış məhduddur və bu aləti qurmaq üçün ciddi əmək tələb olunur.

‍

Onun əvəzində rəqib analizi edərkən “Facebook” və “Telegram” kanalları vasitəsilə müştəri rəylərini oxumaq və onları kateqoriyalaşdırmaq başlanğıc üçün kifayətdir.

‍

Servis sahibi biri olaraq müştəri rəylərini oxumaq üçün ən ideal platformalardan biri “Facebook” qrupu olan “Avtotemir.az”dır.

‍

Burada hər gün bir neçə problem paylaşılır və hər birinin həlli üçün yollar təklif edilir.

‍

‍

Elə indi başlayın!

‍

Rəqib analizi biznesdə boşluqları tapmaq və onlardan faydalanmaq üçün ideal vasitədir.

‍

Müəyyən qədər vaxt və resurs ayırdıqda, rəqib analizini etmək təkbaşına da mümkündür. Ancaq rəqib analizi etməyin ən təhlükəsiz və effektiv yolu işi bilənə həvalə etməkdir.

Əgər siz də rəqib analizini işinin peşəkarı, məsuliyyətli və innovativ bir komandaya etibar etmək istəyirsinizsə, elə indi Trendersə müraciət edin!

‍

‍